Emisioni investigativ “Fiks Fare” ka denoncuar mbrëmjen e së hënës se si vajzat shqiptare pranojnë të punojnë në “kompani” fantazmë duke performuar seks online me klientë nga e gjithë bota.
Një nga gazetaret e emisionit ka mundur të hyjë në këtë rrjet dhe ajo ka zbuluar të paktën 5 apartamente në Tiranë ku vajza të reja performojnë seks përpara kamerës së një kompjuteri.
Në kamerat e fshehta të realizuara nga emisioni vajzat thonë se paguhen mirë dhe se fitimi i tyre rritet sa më gjatë ta mbajnë klientin në linjë. Ato thonë se fitojnë deri në 20 mijë lekë të reja në një natë.
Gazetarja e “Fiksit” ka zbuluar se, disa nga këto vajza punojnë në shtëpitë e tyre me lap-top dhe internet të dhuruar nga pronarët e tyre.
Emisioni ka zbuluar një zyrë pranë “21 dhjetorit”, njërën te “Komuna e Parisit” dhe një tjetër te “Astriri”. Ato janë të paregjistruara në shtet, nuk paguajnë asnjë taksë dhe në shumicën e rasteve janë ilegale.
Ajo që e bën të rrezikshëm këtë “profesion” sipas kamerave të fshehta të regjistruara nga emisioni, është se, disa vajza bien pre e kërcënimeve pasi regjistrohen dhe më pas shantazhohen në mënyrë që të mos largohen nga puna.
Sipas rrëfimit të njërës prej vajzave në një prej këtyre apartamenteve te “Komuna e Parisit”, disa vajza janë detyruar të bëjnë gjëra perverse dhe të dhimbshme. Njëra prej tyre thotë se, ka tentuar të vrasë veten nga këto kërcënime.